Kotabaru,Habis talah papundukan kagusangan dibanam api. Papundukan gasan bubuhan nang bagawi penggergajian kayu alias sirkal.
Kejadiannya Ahat (10/09/23) sekira jam 15.12 WITeng, di Jl. Poltek RT 14 Desa Stagen Kecamatan Pulau Laut Utara.
Papundukan nang diulah matan kayu bahatap seng itu habis gusang, padahal papundukan itu gasan bubuhan nang bagawi sirkal bagana.
Api ancap banar manyalukut papundukan nang andakannya di intangan sirkal, alahan pulang di intangan situ banyak gabuk gergajian nang ancap banyala wan batambah ganal dapatnya hawa panas wan angin kencang batiup.
Api jua sempat baligar membanam kebun ampun warga nang ada di parak intangan situ.
Ujar bubuhan warga disana, di wadah sirkal ba'andah itu kadada nang rahatan bagawi, tagal api tang ada manyalukut papundukan itu sampai gusang.
Api hanyar kawa dipajahi imbah dibantu petugas matan Babinsa, Bhabinkamtibmas, Dinas Kebakaran BPBD, bubuhan Balakar wan bubuhan warga di intangan situ.
Ada warga nang manyambat sirkal itu sudah lawas ada disana menggawi kayu, sudah sekira 5 tahunan, warga kadada nang tahunya siapa ampun sirkal itu. Ada jua nang manyambat jangan-jangan sirkal itu kadada ijin bahan baku kayunya alias sirkal ilegal.
Bubuhan petugas pinanya pacangan menyekidiki napa maraganya papundukan itu kagusangan. ©Jurnalisia™
Jurnalis : Agus Ariyanto
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.