Kotabaru,Saban kalian amun kasalukutan alias kagusangan kadada lagi pinanya nang disalah akan salain kutslit listrik.
Kaya rumah nang kagusangan di RT 04 di Jl. Gunung Ulin Desa Sungai Taib Kecamatan Pulau Laut Kotabaru hanyar-hanyar naya.
Kagusangan rumah nintu sakira jam 23.05 WITeng, Arba (22/11/23) bamula api banyala manyalukut rumah warga nang bangaran Atmo Minaharjo (75). Api matan padu ancap malalar ka barataan rumah nang diulah matan kayu bacampur batun samin.
Di rumah nintu bagana 5 ikung (1 KK). Bubuhan warga disana mamajahi api wan banyu sa'adanya maraga sumbar banyu ngalih. Api kawa dipajahi sakira jam 23.50 WITeng tagal pang rumah sudah rakai dimakan api.
Untung haja pang nang di dalam rumah nintu sawat tabangun rahatan kagusangan nintu makanya bagagas mamajahi api didangani bubuhan warga. Kadada nang kulihan bahaya maraga kagusangan nintu, karugian ditaksir ratusan juta rupiah. ©Jurnalisia™
Penulis : Agus Ariyanto
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.