"Nah, datang dimana ikam ?" takun Utuh Kawakiwa ka Amat Sarabakana.
"Imbah manukar umpan unjun ni pang gasan kaina malam ma'unjun di pahuma'an Amang Utuy Kalimpanan," ujar Amat Sarabakana.
"Kaina gin ai dahulu bulik ka rumah, kita mangupi di warung Acil Ijum sambilan bakikisahan," Utuh Kawakiwa babawa'an.
"Ayu, siapa takut," jawab Amat Sarabakana sambilan tatawa.
Singkat kisah urang badua bakawan ini sudah dudukan mangupi di warung Acil Ijum Muratawa nang katuju liwar tatawa ini biar kisah atawa pandiran urang kada lucu, makanya ngaran sidin tabuat Muratawa.
"Kisah napa nang pacangan kita ungkai ?" takun Amat Sarabakana; nang napa haja kana tarus amun wan inya ini.
"Aku kamarian tu tulak sambahiyang magrib di masigit nang ganal di parak kantur pambakal itu," ujar utuh Kawakiwa mambuka pamandiran.
"Ai lah, panyambahiyang jua ikam ni sakalinya," sahut Amat Sarabakana sambilan tatawa.
"Kada jua pang, sahibar supaya jangan dipadah akan urang aku ini Islam KTP," jawab Utuh Kawakiwa takurihing simpak.
"Imbah itu am dimapa tih ?" takun Amat Sarabakana.
"Kukira tadi banyak urang nang sambahiyang disana, sakalinya huras kaum masigit wan bubuhan kakanakan halus nang sambahiyang; itu gin ai kada banyak urangnya, kada sawat 10 ikung," kisah Utuh Kawakiwa.
"Umai, kamana'an nang tuhanya lah maka bubuhan kakanakan wara ?" takun Amat Sarabakana.
"Aku pang nang tuha wan kaum masigit," jawab Utuh Kawakiwa tatawa salajur manawa akan inya saurang.
"Ba'arti ma'ulah masigit disana itu sahibar gasan supaya talihat ada masigit haja, bahwa di kampung kita ini ada jua tuh ba'isian masigit," ujar Amat Sarabakana tatawa mangakak.
"Nangapa ikam maka manawa akan, ikam haja gin ai amun tapikir handak sambahiyang disana manambahi akan jadi makmun," sahut Utuh Kawakiwa lakun muar mandangar Amat Sarabakana tatawa.
"Aku ni tuh ai sambahiyang di rumah haja wan kulawarga, kada kaubaran sambahiyang di masigit," jawab Amat Sarabakana indah disalahkan.
"Tahu am, alasan ikam haja jua itu, jangan-jangan di rumah gin ai ikam kada sambahiyang jua alahan asik manuntun tiktok haja jua," ujar utuh Kawakiwa.
"Ai lah, bisa-bisanya ikam manuduh kaya itu, ikam haja gin ai hanyar am sakali ka masigit; sudah bapandir lakun pina pararajinnya," Amat Sarabakana manjawab sambil tatawa, Acil Ijum ta'umpat tatawa jua mandangar.
"Sudah gin ai, ampih sudah aku bakisah amun ditawa akan jua, sadang sudah dibayari kupi nang diminum ni, bayar akan ampun jua," ujar Utuh Kawakiwa manyudahi pamandiran.
"Uki, uki, aku nang bayar kupi, kainanya cari kisah nang lain jangan kisah nang kada lucu sakira Acil Ijum kawa jua tatawa," sahut Amat Sarabakana.
Acil Ijum Muratawa nang mandangar ujar Amat Sarabakana, sidin tatawa lucut sambil manarima duit pambayar kupi. ©ISP
521 Pengunjung
Tags
Pojok
