Tanah Bumbu,Bakarubutan pulang habarnya, imbah di Kecamatan Sungai Loban di Kecamatan Simpang Empat damintu jua ada nang bakurubutan alias baramian mamukuli urang.
Tagal bubuhan nang mangarubuti urang di Kecamatan Simpang Empat nintu sudah ditangkap bubuhan Unit Reskrim Polsek Simpang Empat barataan, ada 4 ikung.
Damiya kisahnya, kajadiannya hari Minggu (26/11/23) di Taman Edukasi nang basubalahan wan Pasar Minggu sakira jam 00.40 WITeng.
Panambayan nang bangaran Zainuddin dipukuli babarapa urang di Taman Edukasi. Habar naya dikatahuwani nang kawan dipukuli nintu nang bangaran Lukmanil Hakim malalui chat WA.
Imbah nintu si Lukmanil Hakim naya mambawai nang kawan bangaran Raja Inal Pasaribu mandatangi ka Taman Edukasi. Sampai disana nang badua naya batamuan wan babarapa urang nang bubuhan badua naya kada patuh.
Babarapa urang nang Lukmanil Hakim wan Raja Inal Pasaribu kada patuh naya ada nang baucap "napa garang", tagal kada dihirani nang badua naya.
Rahatan si Lukmanil Hakim handak ka jamban umum, Lukmanil Hakim wan Raja Inal Pasaribu dikarubuti wan dipukuli ulih babarapa urang nintu. Karuan ai nang dipukuli naya babintat-bintat; muha luka gurai, kapala babincul-bincul, gigi patah wan tanggal.
Palaku pangarubutan nang sudah ditangkap Pulisi nintu bagalar Dono, Rahmansyah, Reza wan Hadad Baihaki. ©Jurnalisia™
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.