Kotabaru,Tapakai am amun urusan balulucu maulah orang tatawa wan kada mangantuk, Tuan Guru Das'ad Latif nang diundang gasan bacaramah atawa tausiyah oleh Polres Kotabaru, hanyar-hanyar tadi.
Caramahnya ba'andah di masigit Husnul Khatimah, masigit pangganalnya di Kotabaru, Subuh Minggu (20/08/23), manyasuai akan wan parugram nang bangaran Polisi Pejuang Subuh ulahan Kapolres Kotabaru, AKBP Dr. Tri Suhartanto, SH, MH, M.Si.
Wan parugram ini Polres Kotabaru gasan bubuhan anggotanya nang ba'agama Islam supaya rajinan sambahayang subuh bajama'ah di masigit wan maulah makmur masigit.
Ujar Kapolres, bulan ini kita barataan maramiakan HUT Kemerdekaan, ayo kita barataan maulah gawian nang baik nang kaya digawi oleh bubuhan pahlawan bahari.
Imbah caramah Tuan Guru matan Sulawesi itu Kapolres manjulung paket umrah garatis gasan 3 ikung kaum masigit, nang untung mendapat ya itu; Baim, kaum masigit Raudhatul Jannah Rampa Baru Desa Semayap, Khairil Anwar, kaum masigit ganal Husnul Khatimah, wan Irwan Syahrani, kaum masigit ganal Husnul Khatimah jua. ©Jurnalisia™
Jurnalis : Agus Ariyanto
*Isi Berita Dalam Dialek Kuala
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.