Bapadah ke Pesantren Binian Anum Ini Sakalinya Dibawa Lakian - Jurnalisia™

  • Jurnalisia™

    Mengusung Kearifan Lokal

    Jurnalisia™

    Sumber Data Cuaca: https://cuacalab.id

    Senin, 07 Agustus 2023

    Bapadah ke Pesantren Binian Anum Ini Sakalinya Dibawa Lakian

    Tanah Bumbu,
    Si Rmy (16), warga Desa Pacakan Kecamatan Kusan Hulu Tanah Bumbu ini bapadah ke kuwitan atawa minta ijin handak mandaptar ulang ke Pondok Pesantren Asyafi'ah, sakalinya ada nang mambawai sampai ke jauh ke wilayah Kabupaten Tanah Laut sana.

    Kuwitan nang di rumah maka am hadang-hadang si Rmy ini kada sing bulikan, talipun kada aktip jua. Hara liwar hati kuwitan, balalu malapur ke Pembakal (Kades, Red) Pacakan, bacarian ke wadah kakawanannya.

    Ada saikung kawannya bangaran Nisda nang bakisah inya diminta Rmy ma'antar akan ke pertigaan Desa Binawara, kada tahu diantar akan bajalan kah atawa basapida mutur. Disana itu ujar Nisda sudah ada saikung lakian nang mahadang, Nisda kada tahu jua siapa lakian itu.

    Marasa anaknya ada lakian nang mambawa, kuwitan Rmy ini nyata keberatan, balalu malapur ke Polsek Kusan Hulu, alahan pulang anaknya itu masih di bawah umur.

    Mandapat lapuran, Unit Reskrim Polsek Kusan Hulu dibantu Unit Reskrim Panyipatan Polres Tanah Laut; bahasil ma'aman akan saikung lakian, kada nyaman nah ditulis langsung ngarannya disini, si AA haja gin ai kita sambat, ba'umur 44 tahun, parak jua disambat tuha. Lakian, warga Desa Batakan Kecamatan Panyipatan nang mambawa Rmy ini ditangkap wan dibawa ke Polsek Kusan Hulu gasan diparusis hukum. 

    Kajadian ini sudah sakira 3 mingguan, tagal hanyar haja diungkai polisi ke bubuhan media. ©Jurnalisia™ 

    Tidak ada komentar:

    Posting Komentar

    Komentarmu adalah gambaran isi kepalamu, maka diam lebih bijak daripada sok tahu.

    Beranda