Kotabaru,Banyak sudah nang batajak baliho di pinggir jalan umum, padahal beluman wayahnya kampanye.
Baliho bubuhan pacangan Caleg gasan DPRD Kabupate, Propinsi sampai DPR RI matan bamacam partai; warna biru, kuning, hijau, iya banar kalir pelangi.
Alasannya kada kampanye, tagal sosialisasi, supaya bubuhan masyarakat tahu nang di baliho itu nang pacangan dipilih.
"Kami kada pandang kalir atawa warnanya, nang penting itu orangnya; bisa bajanji wara kah atawa ada bukti pamandirannya kaina amun sudah tapilih," ujar warga di Desa Sekarambut Kecamatan Pulau Laut Barat.
Ujar sidin, sudah banyak buktinya; imbah tapilih kada ingat lagi wan janji. Malibas lalu di kampung bamotor; kaca motor nang hirang kadap rapat batutup, mambunyi akan kalakson haja gin ai kada, hinip lalu.
"Amun janji katia janji haja jua, tu nah di belakang padapuran kami batuyuk janji dalam karung," ujar warga di Desa Semisir, nang ma'ibarat janji itu kadada gunanya.
Bubuhan warga masyarakat pinanya sudah mulai bapintar sasain tahun mahadapi Pemilu atawa Pilkada.
"Memilih nang nyaman dihubungi, nyaman jua ba'adu-adu atawa meminta bantuan gasan nang diperlu akan masyarakat," ujar warga di Lontar. ©Jurnalisia™
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.