Man 2 Kali Kagusangan Rumah di Kotabaru - Jurnalisia™

  • Jurnalisia™

    Mengusung Kearifan Lokal

    Jurnalisia™

    Sumber Data Cuaca: https://cuacalab.id

    Jumat, 11 Agustus 2023

    Man 2 Kali Kagusangan Rumah di Kotabaru

    Kotabaru,
    Man 2 kali kagusangan di Jl. Gunung Karyasari (Gunung Tampurung) Desa Baharu Selatan Kecamatan Pulau Laut Sigam Kotabaru.

    Basanja'an bubuhan warga gigir maraga kagusangan halus haja pang, rumah puang kadada orangnya ampun Harjo (60) parak langgar. Api nang banyala di dalam rumah untungnya sawat kawa dipajahi oleh bubuhan warga nang lalu handak sambahiyang magrib. Ancap bubuhan warga mamajahi rumah kayu itu sabaluman api mambakar bangunan rumah barataan. 

    Imbah mamajahi kagusangan atawa kasulukutan itu bubuhan warga bulik ai ke rumah asing-asingnya. Iya pulang warga RT 05 Gunung Tampurung digigir akan pulang oleh kagusangan rumah nang andakannya kada sabarapa jauh matan kagusangan tadi. Nang gusang ini rumah ampun Anton (50), warga disitu jua, orangnya rahatan bagawi keluar kota. 

    Ujar warga disana, asal api matan balakang rumah batingkat. Api ancap banar mambanam bangunan batingkat nang diulah matan beton wan kayu itu, parak habis sabarataan bangunan kagusangan.

    Masih ujar warga bangaran Syamsir, rumah itu puang, ampunnya kaka Anton nang bagawi jadi tukang bangunan nang bagawi diluar daerah. Sudah babarapa hari ditinggal akan rumah itu, kontak listrik (meteran, sekring listrik) dimati'i, jadinya kadada aliran listrik.

    Api bisa ancap pajah pada sakira jam 21.00 WITeng, Kamis (10/08/23), dipajahi oleh bubuhan Dinas Kebakaran, BNPD, Balakar, PDAM digani'i warga, bubuhan Polres wan Kodim nang umpat ma'aman akan. Kagusangan ini masih diselidiki oleh bubuhan Polres Kotabaru. ©Jurnalisia™

    Jurnalis : Agus Ariyanto 

    *Isi Berita Dalam Dialek Kuala

    Tidak ada komentar:

    Posting Komentar

    Komentarmu adalah gambaran isi kepalamu, maka diam lebih bijak daripada sok tahu.

    Beranda