Maranti, Karuing, Ulin, Pulantan, Bintangur, banyak macam kayu tampuk ganal-ganal,
Paikat, Manau, Ilatung maramba kada pati jauh pada padapuran rumah.
Barata'an wayah naya parak lingis kana tabang, kana sudur mutur barat warna kuning,
Lingis alai, lapang tabing, baganti sawit sajauh mata maniring,
Baganti kabun para di sasala sawit ampun pangusaha bamudal ganal.
Batubara, Amas, sarabanya nang ada di bawah tanah, dikaruk, kada hintat pacang turun bamacam bala; banyu ba'ah, tanah rumbih, kakaringan banyu, kasalukutan, sarabanya.
Siapa nang sugih, lainan andika muha ai urang kampung ampun banua,
Urang luar, nang padatuannya kada suah batanam kancur jariangau; nang sugihnya,
Urang kampung banua kabanyakan nanar marista; manggarunum, putih mata, malumu jariji,
Amun turun bala, urang kampung banua nang banyak manyandang.
Parai irui, bagana di banua nang liwar sugih, tagal kada taumpat sugih,
Paribasa urang bahari, rumput kumpai mangalah akan banua,
Padatuan saurang maka am balangsar dada, haram manyarah, waja sampai ka puting,
Manjaga banua, bakalahi ganal bamatian malawan Walanda, sakalinya mardika; nang kaya masih dijajah. ©ISP
đź‘€ 177
Tags
Prosa
