Tanah Bumbu,Sudah beberapa hari ini di intangan Kelurahan Gunung Tinggi Batulicin aur kasalukutan lahan haja.
Abut dapatnya bubuhan pemadam kebakaran bulang biluk ba'angkut banyu gasan mamajahi api. Kukus tabal ma'ambul jabul hirang talihat matan jauh. Kalalatu jua tarabangan tabawa angin.
Kada tahu siapa nang manyalukut padang nang ditumbuhi banyak pohon kayu Galam. Sadang jua sudah dipadahi wan ditangati jangan manyalukut lahan, tagal pinanya ada haja nang kada ma'asi.
Kada bubuhan pemadam haja nang abut, bubuhan orang kampung gin ai taumpat jua abut. Dimapa Kada abut orang kampung amun maraga kasalukutan lahan itu taumpat jua jaringan wi-fi gangguan, hilang jaringannya; Kada kawa ba'intarnitan.
Malaran lawas jua jaringan intarnit hilang maraga kasalukutan itu, parak sehari semalaman. Sampai habar ini dibaca bubuhan pian, kasalukutan lahan di Gunung Tinggi masih haja. ©Jurnalisia™
Tidak ada komentar:
Posting Komentar
Komentarmu adalah gambaran isi kepalamu, maka diam lebih bijak daripada sok tahu.